投資大方向及理念

投資大方向

上一篇Blog文講左我投資既終極目標:建立12個月現金流系統以達到財務自由。依家要做既就係決定投資大方向去達到目標。

最近睇左龔成既著作《致富藍圖》得到啟發，決定以書中所述既方向作為我投資大方向。

致富藍圖的原則:「先追求資產增值，後追求現金流」。

由於現時係投資初期，雖然過去幾年已累積一筆小資金，但所產生既現金流不多。若追求現金流的話，回報率可能只有每年10%既回報。年輕人最大既資產就係時間，享有極大既複利效應。每年10%回報與每年20%回報30年後既差別非常大。舉個例子，投資者A 每年回報10% 而投資者B 每年回報20%，兩個人都投資10萬，30年後，投資者B的財富係投資者A的16倍。年輕時追求現金流會浪費左複利既威力。

因此，我將資金配置到增值股同潛力股，追求資產增值以充分利用同享受複利既威力。

目標年回報率:17.5%

現時投資組合

現時既投資組合係定下上述大方向前買入，未來會有變動。

投資理念
龔成既著作《致富藍圖》比我另係一個好重要既投資理念就係「資產升值，現金眨值」，一生不斷將現金轉換成資產。財富以資產形式持有。投資要著眼於資產價值，而非現金。

好多人都講過一句說話「一日唔賣，D錢都唔係你既」，追求既係現金差價。呢句說話既含意就係累積現金。呢個想法好不智，因為現金係貨幣系統數量只會不斷慢慢增加。現金既價值不斷慢慢下跌。累積現金等同累積不斷眨值既野。大家可以從以下影片知道貨幣系統既真相

資產一方面係貨幣系統下不斷上升以反映現金眨值。另一方面，資產亦會資產質素上升而增值。以企業為例，企業會因為銷售量上升以致盈利上升，令企業價值增加。

要致富，財富要配置到貨幣系統以外，以資產形式持有。呢個理念唔單止防止自己辛苦賺既錢被人偷，仲可以成為資產擁有人，將自己放係有利位置。

投資為豐盛人生之本

大家好! 我是一名八十後，自我數年前開始接觸投資理財，透過閱讀投資理財書籍及各位Blogger 既文章，加上自己係投資路上的起跌，確立投資的目的與及投資係人生中的意義，從此愛上投資，醉心研究投資。

投資是人生之本，是豐盛富足人生的基石。

我諗一切要由數年前說起，當時我已踏足社會一段短日子，開始思考人生的方向同意義。經過不斷的思考、觀察、閱讀，我預視到人生有兩個問題要解決 (提早中年危機 ，哈哈)

第一個問題是在於基本生活。呢個問題同世界貨幣系統同埋退休生活有關。

現今世界貨幣系統就係不斷印銀紙，將錢放係存蓄戶口，等同每日被人偷錢，唯有投資先可以保住財富既購買力。至於點解會形成今日的世界貨幣系統，有機會寫文再談。

現時香港人平均壽命好長，根據日本厚生勞動省的數據，2015年香港男性和女性分別係81歲及87歲。距離退休年齡65歲平均有16至22年，我意識到必須未雨籌謀，為退休後的生活費做好準備。

第二個問題係人生意義。好多人人生在世(包括我)都係為左自己、老公/老婆同仔女有更好既家庭生活質素。要有好生活就要努力搵錢。普遍香港人工時長人所共知，壓力又大。放工之後僅得少量的時間同心力放係家庭生活，星期日都有機會因為諗住星期一的工作而影響心情，影響家庭生活質素。不能達成更好家庭生活質素的目標。

上文提及到好生活就要努力搵錢，好容易陷入《富爸爸、窮爸爸》所說的老鼠賽跑。隨住收入增加，年輕夫婦決定買樓。買左樓，就要交稅(係香港而言，要供樓)。然後買車買家私。之後仔女出世，又要努力工作搵錢，供書教學。到左五十歲，仔女有本事搵食，先發現冇足夠的錢退休。

總括而言，就是窮忙生活，一生受盡金錢束縛。

理想家庭生活質素以及做生活中有意義的事情，就係我定義的富足豐盛人生。

解除金錢的束縛達致富足豐盛人生的方法：儲資產以建立自動產生現金流系統

自動產生現金流系統夠強大，所產生的被動收入能夠應付生活所需，就財務自由，解除金錢的束縛。

現金流系統要有兩個重要要素

1. 12個月要有現金流

2. 現金流要不斷增長 

達到以上兩點先可以全年有被動收入應付生活所需以及解決通漲問題

個人目標: 35歲 100萬 46歲 1000萬

講左咁耐，講下我寫Blog目的。

第一個目的係希望將自己的投資理念、心路歷程、資產配置以及未來投資動向透過文字一一記錄，以明晰心中所想。 (好似我依家咁，寫呢篇文章都寫左好耐 =D)
第二個目的係與各位Blogger多多交流，係投資路上結伴同行。有感係香港認真對待投資的人唔多，大部分人都係投機。